१६ चैत, मकवानपुर । मकवानपुरको सिस्नेरीमा भएको ट्याक्सी दुर्घटनामा ६ जनाको मृत्यु भएको छ । काठमाडौंबाट विराटनगरका लागि हिँडेको ट्याक्सी दुर्घटना हुँदा मोरङ केतरीयाका ३५ वर्षका दुर्गा पौडेल, ११ वर्षका प्रज्वल पौडेल, ३ वर्षकी बालिका प्राञ्जली पौडेल छन् । त्यस्तै दैलेख घर भई हाल मातातिर्थ बस्दै आएकी २६ वर्षकी कुसुम विष्ट, १० वर्षका बालक प्रज्वल विष्ट र नाम नखुलेका एक नाबालक रहेको प्रहरीले जनाएको छ ।
दुर्घटनामा गम्भीर घाईते भएका ट्याक्सी चालक मोरङ्गका यज्ञप्रसाद पौडेलको काठमाडौंमा उपचार भइरहेको छ । बा १ ज ३९९० नम्बरको ट्याक्सी राति पौने १० बजे दुर्घटना भएको हो । ब्रेकफेल भएर दुर्घटना भएको अनुमान गरिएपनि दुर्घटनाको कारण खुल्न नसकेको र ट्याक्सी सडकबाट डेढसय मिटर तल पुगेको प्रहरीले जनाएको छ ।
